काठमाडौं । शनिबार मुलुकभरबाट १ हजार ४१ जना कोरोना संक्रमित थपिएको स्वास्थ्य तथा जनसंख्या मन्त्रालयले पुष्टि गरेको छ । थपिएका संक्रमितमध्ये ३४९ महिला र ६९२ पुरुष छन् । यीसँगै नेपालमा संक्रमितको कुल संख्या ४५ हजार २७७ पुगेको मन्त्रालयका प्रवक्ता डा. जागेश्वर गौतमले बताएका छन् । उनका अनुसार पछिल्लो २४ घण्टाको अवधिमा १२ हजार ४ सय ७३ जनाको पिसिआर परीक्षण भएको थियो ।

मन्त्रालयका अनुसार यसै अवधिमा थप १५ सय ६६ जना कोरोनामुक्त भएका छन् । यसरी अहिलेसम्म निको हुनेको संख्या २७ हजार १२७ पुगेको छ । यो कुल संक्रमितको ६० प्रतिशत हो ।

त्यसैगरी २४ घण्टाको अवधिमा थप ९ जनाको कोरोनाबाट मृत्यु भएको मन्त्रालयले पुष्टि गरेको छ । यीसहित कोरोनाबाट हालसम्म मृत्यु हुनेको संख्या २ सय ८० पुगेको सरकारी तथ्यांकमा उल्लेख गरिएको छ ।