काठमाडौं । उपत्यकामा बिहीबार थप ४ सय ४५ जनामा कोरोना संक्रमण देखिएको स्वास्थ्य तथा जनसंख्या मन्त्रालयले पुष्टि गरेको छ । जसमध्ये काठमाडौँका ३ सय ५७ , ललितपुरका ४६ र भक्तपुरका ४२ जना संक्रमित भएको मन्त्रालयको प्रवक्ता डा. जागेश्वर गौतमले जानकारी दिएका छन् । भदौ १७ काठमाडौं उपत्यकामा ३ सय ८८ जना संक्रमित भेटिएका थिए ।

त्यसैगरी विगत २४ घण्टामा उपत्यकाका ४ सय ४५ सहित मुलुकभरबाट १ हजार २ सय २८ जना कोरोना संक्रमित थपिएको मन्त्रालयका प्रवक्ता डा. गौतमले पुष्टि गरेका हुन् । यीसँगै अहिलेसम्म नेपालमा कोरोना संक्रमितको संख्या ४२ हजार ८७७ पुगेको छ ।

प्रवक्ता डा. गौतमका अनुसार कुल संक्रमितमध्ये हालसम्म २४ हजार २ सय ७ जना कोरोनामुक्त भएका छन् । बिहीबारमात्रै ९ सय १७ जना डिस्चार्ज भएका छन् । त्यस्तै सक्रिय संक्रमितको संख्या हालसम्म १८ हजार ४ सय १३ पुगेको छ ।

अहिलेसम्म कोरोनाबाट ज्यान गुमाउनेको संख्या २ सय ५७ पुगेको सरकारी तथ्यांकमा उल्लेख गरिएको छ ।