काठमाडौं । विगत २४ घण्टामा थप १ हजार १ सय २० जनामा कोरोना संक्रमण देखिएको स्वास्थ्य तथा जनसंख्या मन्त्रालयले बताएको छ । बुधबारको कोभिड–१९ अपडेटमा मन्त्रालयका प्रवक्ता डा. जागेश्वर गौतमले त्यसमध्ये ३ सय २० महिला र ८ सय पुरुष भएको बताए । उनका अनुसार यीसहित नेपालमा अहिलेसम्म संक्रमितको संख्या ४१ हजार ६ सय ४९ पुगेको छ ।

प्रवक्ता डा. गौतमका अनुसार यस अवधिमा १ हजार १ सय १२ जना कोरोनाबाट मुक्त भई घर फर्किएका छन् । यीसहित हालसम्म कोरोनाबाट निको हुनेको संख्या २३ हजार २ सय ९० पुगेको छ । त्यस्तै अहिले मुलुकभरमा सक्रिय संक्रमितको संख्या १८ हजार १ सय ८ पुगेको छ । तीमध्ये ७ हजार ६ सय १५ जना होम आइसोलेसनमा बसेका छन् भने १० हजार ४ सय ४३ जना संस्थागत आइसोलेशनमा छन् ।

विगत २४ घण्टामा थप १२ जना कोरोना संक्रमितको मृत्यु भएको मन्त्रालयले पुष्टि गरेको छ । यसरी अहिलेसम्म कोरोनाबाट ज्यान गुमाउनेको संख्या २ सय ५१ पुगेको छ । त्यसैगरी क्वारेन्टाइनमा ६ हजार ७६६ जना रहेका छन् ।