काठमाडौं । स्वास्थ्य तथा जनसंख्या मन्त्रालय अनुसार बिहीबार थप ७ सय ७ जना कोरोना संक्रमित थपिएका छन् । मन्त्रालयको कोभिड–१९ ब्रिफिङमा प्रवक्ता डा. जागेश्वर गौतमले मुलुकभरका प्रयोगशालामा ११ हजार ८ सय ३२ जनाको पिसिआर परीक्षण हुँदा उक्त संख्यामा नयाँ संक्रमित थपिएको पुष्टि गरेका हुन् । यीसँगै नेपालमा संक्रमितको संख्या २९ हजार ६४५ पुगेको छ ।

त्यसैगरी बिहीबार थप २६३ जना कोरोना जितेर डिस्चार्ज भएका छन् । योसँगै कुल डिस्चार्ज हुनेको संख्या १७ हजार ९६४ पुगेको प्रवक्ता डा. गौतमले बताए ।

मन्त्रालयका अनुसार आइसोलेसनमा रहनेको संख्या ११ हजार ५५५ रहेको छ । अहिलेसम्म क्वारेन्टाइनमा रहनेको संख्या ११ हजार ७६८ जना पुगेको छ । मुलुकभरबाट अहिलेसम्म ५ लाख ६६ हजार १५ वटा नमूनाको पीसीआर विधिबाट परीक्षणहरु गरिएका छन् ।

त्यस्तै पछिल्लो २४ घण्टामा थप ६ जनाको मृत्यु भएको मन्त्रालयले पुष्टि गरेको छ । मृतकमध्ये काठमाडौंकी एक महिला, मकवानपुर र सप्तरीका एकएक पुरुष छन् भने पर्सामा दुई पुरुष र एक महिलाको मृत्यु भएको छ । योसँगै नेपालमा कोरोनाबाट ज्यान गुमाउने १२६ पुगेको छ ।