काठमाडौं । कोरोना संक्रमणका कारण विगत २४ घण्टामा थप ७ जनाको मृत्यु भएको स्वास्थ्य तथा जनसंख्या मन्त्रालयले पुष्टि गरेको छ । मृतकहरु काभ्रे, नवलपरासी, मोरङ, धनुषा, बाँके र तनहुँको भएको मन्त्रालयले बताएको छ । यीसँग नेपालमा कोरोनाबाट मृत्यु हुनेको संख्या ११४ पुगेको मन्त्रलायको तथ्यांकमा उल्लेख गरिएको छ ।

मंगलबार मन्त्रालयको नियमित कोभिड–१९ अपडेटमा मन्त्रालयका प्रवक्ता डा. जागेश्वर गौतमले सोही अवधिमा देशभरबाट १ हजार १६ जनामा संक्रमण पुष्टि भएको बताएका छन् । यसरी नेपालमा अहिलेसम्म कोराना संक्रमितको संख्या २८ हजार २ सय ५७ पुगेको छ ।

प्रवक्ता गौतमका अनुसार पछिल्लो २४ घण्टामा थप ८५ जना संक्रमित निको भइ डिस्चार्ज भएका छन् । यीसहित हालसम्म निको हुनेको संख्या १७ हजार ५ सय ८० पुगेको छ । अहिले देशभरि १० हजार ५६३ जना सक्रिय संक्रमितको विभिन्न अस्पतालमा उपचार भइरहेको छ । त्यस्तै क्वारन्टीनमा १३ हजार ९२६ जना रहेका छन् ।