काडमाडौं । पछिल्लो २४ घण्टामा थप ८ जनाको मृत्यु भएको स्वास्थ्य तथा जनसंख्या मन्त्रालयले पुष्टि गरेको छ । यीसँगै हालसम्म नेपालमा कोरोना संक्रमणका कारण मृत्यु हुनेको संख्या ९१ पुगेको मन्त्रालयका प्रवक्ता डा. जागेश्वर गौतमले बताएका छन् । उनका अनुसार यस अवधिमा मृत्यु हुनेहरुमा धनुषाका दुई, सप्तरी, धादिङ, मोरङ, कपिलवस्तु, बारा र काठमाडौं जिल्लाका एक–एक जना रहेका छन् । मृतकहरु ३२ देखि ७८ वर्षसम्मका छ पुरुष र दुई जना महिला छन् ।

मन्त्रालयका अनुसार बुधबार ४८४ जना नयाँ संक्रमित थपिएसँग नेपालमा अहिलेसम्म कोरोना संक्रमितको संख्या २४ हजार ४३२ पुगेको छ । यीमध्ये १६ हजार ७ सय २८ जना निको भई घर फर्किएका छन् । त्यस्तै अहिले मुलुकका विभिन्न कोरोना अस्पतालमा ७ हजार ६ सय १३ जना सक्रिय संक्रमित छन् ।

त्यसैगरी अहिले देशभरिका क्वारन्टीनमा १४ हजार ८४८ व्यक्ति पुगेको मन्त्रालयले जनाएको छ ।