काठमाडौं । पछिल्लो २४ घण्टामा ४८४ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयको कोभिड–१९ अपडेटमा मन्त्रालयका प्रवक्ता डा. जागेश्वर गौतमले मुलुकभरबाट ४८४ संक्रमित थपिएको पुष्टि गरेका छन् । उनले थपिएका नयाँ संक्रमितसँगै नेपालमा अब संक्रमितको कुल संख्या २४ हजार ४३२ पुगेको जानकारी दिए । सो अवधिमा १० हजार ४८१ जनाको पीसीआर परीक्षण गरिएको प्रवक्ता डा. गौतमले बताए ।

मन्त्रालयका अनुसार यस अवधिमा थप ६४ जना कोरोना जितेर डिस्चार्ज भएका छन् । यसरी हालसम्म कोरोनाबाट १६ हजार ७ सय २८ जना निको भई घर फर्किएका छन् । यो निको हुने दर ६८.४ प्रतिशत भएको मन्त्रालयले बताएको छ । अहिले मुलुकका विभिन्न कोरोना अस्पतालमा ७ हजार ६ सय १३ जना सक्रिय संक्रमित छन् ।

त्यसैगरी अहिले देशभरिका क्वारन्टीनमा १४ हजार ८४८ व्यक्ति भएको मन्त्रालयले जनाएको छ । हालसम्म कोरोनाकै कारण मृत्यु हुनेको संख्या ९१ पुगेको मन्त्रालयको तथ्यांकमा उल्लेख गरिएको छ ।