काठमाडौं । काठमाडौं उपत्यकामा मंगलबार १३४ जनामा कोरोना पुष्टि भएको छ । मुलुकभरका विभिन्न प्रयोगशालामा १० हजार ४६२ वटा नमूनाको पिसिआर परीक्षण भएकोमा काठमाडौं उपत्यकाका मात्र १३४ जना रहेका छन् । तीमध्ये काठमाडौंका ११०, ललितपुरका १६ र भक्तपुरका ८ हुन् । यसरी हेर्दा उपत्यकामा कोरोना संक्रमण दर दिनदिनै बढिरहेको छ ।

प्रवक्ता डा. जागेश्वर गौतमका अनुसार नेपालमा अहिलेसम्म कोरोना संक्रमितको कुल संख्या २३ हजार ९४८ पुगेको छ । मंगलबार मुलुकभरबाट थप ६३८ जना कोरोना संक्रमित थपिएका छन् । अहिले सक्रिय संक्रमितको ७ हजार २०१ जना पुगेको प्रवक्ता गौतमले बताए ।

पछिल्लो २४ घन्टामा १७१ जना डिस्चार्ज भएको मन्त्रालयले बताएको छ । मन्त्रालयका अनुसार यीसहित नेपालमा कोरोना जित्नेको कुल संख्या १६ हजार ६ सय ६४ पुगेको छ । त्यस्तै क्वारेन्टाइनमा रहनेको संख्या ११ हजार ५८ पुगेको छ ।

त्यस्तै, कोरोना संक्रमणका कारण हालसम्म ८३ जनाको मृत्यु भएको सरकारी तथ्यांकमा उल्लेख गरिएको छ ।