काठमाडौं । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ६३८ जना कोरोना संक्रमित थपिएका छन् । मन्त्रालको नियमित प्रेस ब्रिफिङका क्रममा प्रवक्ता डा. जागेश्वर गौतमले मंगलबार ६३८ जना नयाँ संक्रमित थपिएको पुष्टि गरेका हुन् ।

यीसहित नेपालमा अहिलेसम्म संक्रमितको संख्या २३ हजार ९ सय ४८ पुगेको छ । सो अवधिमा देशभरिका विभिन्न प्रयोगशालामा १० हजार ४ ६२ वटा नमूनाको पिसिआर परीक्षण भएको थियो ।

त्यसैगरी अहिलेसम्म नेपालमा कोरोनामुक्त हुनेको १६ हजार ६६४ पुगेको छ । पछिल्लो २४ घण्टामा थप १७१ जना डिस्चार्ज भएको सो अवसरमा प्रवक्ता डा. गौतमले जनाकारी दिए ।

मन्त्रालयका अनुसार ७ हजार २०१ जना सक्रिय संक्रमितको विभिन्न अस्पतालमा उपचार भइरहेको छ । अहिले क्वारेन्टाइनमा ११ हजार ५८ जना रहेका छन् । कोरोना संक्रमण कारण हालसम्म मृत्यु हुनेको संख्या ८३ पुगेको मन्त्रालयको तथ्यांकमा उल्लेख छ ।