काठमाडौँ । आइतवार नेपालमा कोरोना भाइरस संक्रमणका कारण थप एक जनाको मृत्यु भएको स्वास्थ्य तथा जनसङ्ख्या मन्त्रालयले जनाएको छ ।

अब नेपालमा कोरोना भाइरसको संक्रमणबाट मृत्यु हुनेको संख्या दुई पुगेको छ । बाँकेको नरैनापुरस्थित क्वारेन्टाइनमा मृत्यु भएका २५ वर्षीय युवामा कोरोना पोजिटिभ भेटिएको स्वास्थ्य तथा जनसंख्या मन्त्रालयको नियमित पत्रकार सम्मेलनमा प्रवक्ता डा. विकास देवकोटाले जानकारी दिएका हुन् ।

रोजगारीका लागि भारतको मुम्बइ गएका उनी गत वैशाख ३० गते नरैनापुर आएर क्वारेन्टाइनमा बसेका थिए ।

उनको शनिबार स्वाब संकलन गरिएको र परीक्षण गर्दा नतिजामा कोरोना पोजिटिभ आएको मन्त्रालयले जनाएको छ । आइतबार बिहान स्वास्थ्यमा समस्या आई उनको मृत्यु भएको थियो ।

यसअघि गत बिहीबार धुलिखेल अस्पतालमा ज्यान गुमाएकी सिन्धुपाल्चोककी महिलाको कोरोनाका कारण ज्यान गएको मन्त्रालयले पुष्टि गरेको थियो । नेपालमा कोरोना संक्रमितको संख्या २९१ पुग्दा मृतकको संख्या दुई पुगेको हो ।