काठमाडौं । नेपालमा कोरोनाभाइरस (कोभिड-१९) का कारण एक महिलाको मृत्यु भएको छ । सिन्धुपाल्चोकको बाह्रविसे नगरपालिका, राम्चे घर भएकी २९ वर्षीया सुत्केरी महिलाको कोरोनाको कारण मृत्यु भएको स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीले जानकारी दिएका छन् । नेपालमा कोरोनाले मृत्यु हुने उनी पहिलो हुन् । उनको बिहीबार राति मृत्यु भएको थियो ।

ती महिला बैशाख २३ गते महाराजगञ्जस्थित शिक्षण अस्पतालमा भर्ना भई २४ गते बच्‍चा जन्माएर २५ गते डिस्चार्ज भएकी थिइन् । उनलाई घर पुगेपछि स्वास्थ्यमा समस्या देखिएसँगै धुलिखेल अस्पताल ल्याइएको थियो । उपचारका लागि धुलिखेल ल्याउँदै गर्दा बाटोमै उनको मृत्यु भएको मन्त्रालयले जनाएको छ ।

यस सम्बन्धमा थप विवरण लिइएको र परीक्षण गर्दा मृत्युको कारण कोरोना भाइरसको संक्रमण भएको मन्त्रालयले जानकारी दिएको छ ।

यसैगरी शनिबार राति थप २ जना कोरोना सङ्क्रमण पुष्टि भएको छ । उनीहरु धनुषा निवासी २० तथा ६५ वर्षीय पुरुषहरु भएको स्वास्थ्य मन्त्रालयले पुष्टि गरेको छ । योसंगै नेपालमा सङ्क्रमितको संख्या २८१ पुगेको छ।