बेनी । म्याग्दी प्रवेशको मुख्यद्वार बेनी बजारको सडकमा कीटनाशक औषधि छरिएको छ । प्रजिअ ज्ञाननाथ ढकाल र प्रहरी नायब उपरीक्षक कुँभरको नेतृत्वमा खटिएको सुरक्षाकर्मीको टोलीले आज दमकलको प्रयोग गरी बेनी बजारभित्र र आसपासका सडकमा पानीमा क्लोरिन मिसाएर बनाइएको कीटनाशक औषधि छरेका हुन् ।

कोरोना भाइरस नियन्त्रण अभियानअन्तर्गत सडकमा कोरोना सङ्क्रमित व्यक्तिहरु आवतजावत गरेको हुनसक्ने भएकाले भाइरसलाई नै नष्ट गर्ने कीटनाशक औषधि छरिएको प्रजिअ ढकालले बताएका छन् । बेनी बजार क्षेत्रसँगै मानिसको आवतजावत बढी हुने क्षेत्र र बाक्लो बस्ती भएका स्थानका ग्रामीण सडकमा समेत कीटनाशक औषधि छर्ने योजना रहेको प्रजिअ ढकालको भनाइ छ ।

जिल्ला सुरक्षा समितिले म्याग्दीमा सरकारले घोषणा गरेको लक डाउन र समितिले जारी गरेको निषेधाज्ञाको कार्यान्वयन गराउनसमेत सक्रियता बढाएको छ । बजार क्षेत्रसँगै ग्रामीण क्षेत्रमा समेत नागरिकलाई घरभित्र बस्न आग्रह गर्ने र विदेशबाट चैत महिनायता घर आएकालाई क्वारेन्टाइनमा राख्न थालिएको छ । विदेशबाट आएका व्यक्तिहरुको वडा र गाउँपालिकामार्फत लगत सङ्कलनको कार्य भएसँगै चैत १ गतेयता विदेशबाट आएकालाई बेनीको न्यू वेष्ट प्वाइन्ट र माउन्ट एभरेष्टको भवन तथा स्थानीय तहमा निर्माण गरिएका क्वारेन्टाइनमा राख्न थालिएको जिल्ला प्रशासन कार्यालयले जनाएको छ ।