काठामाडौं ।

थपिएका पाँचवटा संवैधानिक आयोग मध्ये कर्मचारी व्यवस्थापनको अभावमा मधेशी,थारु र मुस्लिम आयोगले अहिलेसम्म काम शुरु गर्न सकेका छैनन् ।

आ–आफ्नो भाषा, स‌ंस्कृतिको स‌ंरक्षण र समुदायको हकहितका लागि गठन भएका मधेशी, थारु र मुस्लिम सहित पाँचवटै आयोगका अध्यक्षले गत बिहिबार पद बहाली गरेका हुन् । तर अरु सदस्य अहिलेसम्म सिफारिस गरिएको छैन् । एक त आयोगमा पदाधिकारी सिफारिसमै बिलम्व गरिएको थियो त्यसमाथि अहिले अध्यक्ष नियुक्तिसँगै कार्यालय स्थापना भएपनि आवश्यक कर्मचारीको व्यवस्था अझै गरिएको छैन् । जसले गर्दा आयोगले काम थाल्न सकेका छैनन् । जस्तो ३१ जनाको दरबन्दी रहेको थारु आयोगमा पाँचजना चालक सहित जम्मा ११ कर्मचारी छन् ।
मधेसी आयोगलाई पनि काम अघि बढाउन कर्मचारीकै अभाव छ । त्यसमाथि पदाधिकारी भनेकै अध्यक्ष मात्र हुन् । अध्यक्ष विजय दत्त भने मधेसी समुदायको गुनासो सुनुवाइबाट काम थाल्ने र त्यसका लागि डिजिटल मैत्री एप्स बनाउने तयारी भैरहेको बताउँछन् ।

मुस्लिम आयोगमा पनि दरबन्दी अनुसार कर्मचारी छैनन् भने सदस्यहरुको नियुक्ति समेत बाँकी नै छ । अझ आयोगका अध्यक्ष समिम अन्सारी विरुद्ध सर्वोच्च अदालतमा उजुरी परेको छ । यस्तो अबस्थामा काम अघि बढाउन मुस्लिम आयोगलाई झन अप्ठ्यारो देखिन्छ । साविकका ८ बाहेक सबै जातजातिको अधिकार संरक्षणका लागि भनेर बनाइएका नयाँ संवैधानिक आयोगको कार्यप्रारम्भ नै सुस्त छ । नयाँ आयोगलाई प्रभावकारी बनाउन समयमै ध्यान नदिने हो भने यी आयोगमा केही व्यक्तिले आकर्षक सेवा सुविधा पाउँने छन् तर गठन बमोजिमको लक्ष्य पुरा हुने छैन् ।