काठमाडौं ।

प्रधानमन्त्री केपी शर्मा ओलीले समृद्धिका लागि सबैखालका आधार र संरचना तयार भएको बताएका छन्। रिपोर्टर्स क्लब नेपालको २१ औं वार्षिकोत्सवको अवसरमा आयोजित कार्यक्रममा प्रधानमन्त्री ओलीले असहज अवस्थामा कानुन निर्माण र संरचना बनाइएको दाबी गरे। कर्मचारी समायोजनजस्ता सहज नभएका काम सकेर कानुन पनि बनिरहेका कारण अव विकासका काम गर्न सजिलो हुने ओलीको भनाई छ । प्रधानमन्त्री ओलीले समृद्ध नेपाल सुखी नेपालीको सबै आधार तयार भएको बताए । समृद्ध नेपाल आफैं बनाउन सक्षम रहे पनि समय लाग्ने भएकाले विदेशीसँग सहकार्य गर्ने प्रयत्न गरेको प्रधानमन्त्रीले प्रष्टीकरण दिए। प्रधानमन्त्री ओलीले नेपालमा द्वन्द्व चर्काउने प्रयास पटकपटक भए पनि त्यस्ता प्रयास असफल बनाइएको दाबी गरे। देश पृथकतावाद, टुक्र्याउनुपर्छ भन्ने माग नरहेको अवस्थामा रहेको र एकजुट अवस्थामा पुगेको उनको भनाइ छ। प्रधानमन्त्री ओलीले अहिलेको अवस्था जसरी पनि विरोध र समर्थन गर्नुपर्ने अवस्थामा नरहेको भन्दै सकारात्मक सोच राख्न आग्रह गरे। सञ्चारमाध्यम र सामाजिक सञ्जालमा प्रस्तुत हुने युवाले हामी विकसित दुनियाँका सन्तानभन्दा पनि सभ्य र सुसंस्कृत समाजका हौं भन्ने भुल्नु नहुने प्रधानमन्त्री ओलीले स्मरण गराए।