काठमाडौं ।

औषधी व्यवस्था विभागका महानिर्देशक नारायण ढकालले अख्तियारको दुरुपयोग गर्दै अनियमित ढंगले काम गरेको उजुरी छ, तर कारवाही भएको छैन ।
अनधिकृत व्यक्तिलाई विभागको महत्वपूर्ण र संवेदनशील फाइल तथा कागजात जिम्मा लगाउनेदेखि कानुनले तोकेभन्दा बढी सुविधा लिनेमा उनले कीर्तिमान नै कायम गरेका छन् । विषय विज्ञता नै नभएको कनिष्ठ व्यक्तिलाई निमित्त प्रमुखको जिम्मेवारी दिएको, कार्यालयको क्यान्टिन भाडामा लगाउने विषयमा समेत अनियमित निर्णय गरेको भनी कर्मचारीहरु विभिन्न निकायमा कराउन जाँदा पनि केही समाधान निस्किएको छैन । विभागका कम्प्युटर अपरेटर नेत्रनारायण शर्मालाई कर्मचारी प्रशासन शाखाले पुस मसान्तदेखि लागु हुनेगरी जागिरबाट हटाएको पत्र थमायो । उनलाई करार सेवातर्फ कम्प्युटर अपरेटर पदमा भर्ना गर्न नसकिने भएकाले सेवा करार अवधी थप गरी कामकाजमा खटाउन नसकिने स्पष्ट व्यहोरासहित लेखिएको थियो । तर, ढकालका विश्वासपात्र भएकाले सेवाबाट हटाएको पत्र थमाए पनि शर्मा नियमित काम गरिरहेका छन् । पत्रमा आर्थिक तथा जिन्सी पनि फिर्ता गर्नु भनिएको छ । तर, उनले लिएका कुनै पनि सामग्री फिर्ता गरेका छैनन् । बरु उल्टै अन्य उच्च अधिकारीहरुको अधिकार खोसेर शर्मामार्फत् आर्थिक चलखेल गरिरहेको बताइन्छ । उनको काम नै महानिर्देशक ढकालको डिजाइनमा औषधी उत्पादक, फार्मेसी सञ्चालक, आयतकर्तालगायतसँग डिल गर्नु हो । कम्प्युटर अपरेटर भए पनि शर्माले अधिकृतस्तरको सेवा सुविधा लिइरहेका छन् । उनलाई ढकालको दबाबमा विभागले बा २ ब ६७६९ नम्बर प्लेट भएको मोटरसाइकल दिएको छ ।
महानिर्देशक ढकालले पदीय हैसियतको दुरुपयोग गर्दै दुई गाडी प्रयोग गरिरहेका छन् । चलिरहेको गाडी बनाउने भनेर लाखौँ खर्च गरी मर्मत गरेको गाडी थन्काएर राखेका छन् । मर्मत खर्चको नाममा चार लाखभन्दा बढी भुक्तानी लिएर घरमा नै राखेको बा १ झ ७१३१ को प्राडो गाडी हो । प्रायःजसो सो गाडी परिवारका सदस्यले निजी काममा प्रयोग गर्दै आएका छन् । उनले अहिले बा २ झ ३६२८ नम्बरको निसानको टोर्रानो कार प्रयोग गरिरहेका छन् ।
त्यस्तै, आफ्नो क्षेत्राधिकार नाघेर सरकारले निर्णय गर्नुपर्ने राष्ट्रिय औषधी प्रयोगशालामा रिक्त प्रमुख पद (एघारौं तह) मा शैलेश झालाई निमित्तको जिम्मेवारी दिएका छन् । उनी स्वास्थ्य सेवाका नभई निजामतीतर्फ इञ्जिनियरिङ सेवाअन्तर्गत केमिष्ट्री समूहका उपसचिव हुन् । उनलाई आर्थिक र प्रशासनिक अधिकारसहित पुस ३० गतेदेखि निमित्त प्रमुखको जिम्मेवारी दिइएको जनआस्थालाई प्राप्त कागजमा देखिन्छ ।
१० औं तहमा कार्यरत बरिष्ठ कर्मचारी प्रमोद केसी र शिवानी खड्गीको तलबस्केल पनि सहसचिव सरह रहेको छ । उपसचिवको ओहोदामा रहेका झा भन्दा सहसचिवसरहका केसी र खड्गी बरिष्ठ भए पनि झाको मातहतमा रहने गरी अधिकार प्रदान गरेकाले कार्यसम्पादनमा समस्या भएको जनआस्थाको समाचारमा उल्लेख छ ।