34

  • काठमाडौं ।

    ताप्लेजुङमा भएको हेलिकप्टर दुर्घटनामा पर्यटन व्यवसायी आङछिरिङ शेर्पाको समेत निधन भयो। यो घटनामा संस्कृति, पर्यटन तथा नागरिक उडड्यनमन्त्री रवीन्द्र अधिकारीसहित सात जनाको ज्यान जान गयो ।

    सोलुखुम्बुको मात्र नभई देशकै खम्बाको रुपमा रहेका पर्यटन व्यवसायी शेर्पाको निधनले सोलुखुम्बु स्तब्ध बनेको छ। सोलुखुम्बुको खुम्बुपासाङ ल्हामु गाउँपालिका–१ मा जन्मिएका शेर्पा पर्यटन क्षेत्रको सफल व्यवसायी थिए।

    परिवार नै पर्यटन क्षेत्रमा भएका कारण उनको योगदान उच्च छ । सोलुखुम्वु जिल्लाको समग्र पर्यटन प्रर्वद्धन गर्ने सन्दर्भमा पनि शेर्पाले महत्वपूर्ण योजना निर्माण गरेका थिए । अव यो योजना शेर्पाका सधै अपुरा रहे । खुम्बुको लुक्लासम्म सडक पुर्‍याउने उनको ठूलो प्रयास थियो ।

    विभिन्न कम्पनी सञ्चालन गरेर सयौँ व्यक्तिलाई रोजगारी दिएका शेर्पाको मृत्युको खबर सुनेपछि देशभरका अरु मानिस झै सोलुवासी स्तब्ध भए।

    आङछिरिङ चर्चित सगरमाथा आरोही स्व पासाङल्हामु शेर्पाका साँहिला देवर हुन्। भाउजुले सगरमाथा आरोहण गर्दा आङछिरिङ ट्रेकिङ व्यवसायमा जेडिएका थिए। गाउँबाट भरिया बन्न काठमाडौं आएका शेर्पाको चार दशकको यात्राले पर्यटन क्षेत्रमा योगदान दिए।

    हिमाली पर्यटन व्यवसायमा लागेका आङछिरिङ २० वर्षको छोटो अवधिमा यति एयरलाइन्स, तारा एयरलाइन्स र हिमालय एयरको मालिक बन्न सफल भए। काठमाडौंको गोकर्ण रिसोर्ट, भैरहवाको कसरा रिसोर्ट, सोलुखुम्बुको यति होमलगायत सुविधा सम्पन्न होटल र रिसोर्टमा उनको लगानी छ।

    सगरमाथा आरोहण गर्ने पहिलो नेपाली महिला स्वर्गीय पासाङल्हामु आङछिरिङकी माइली भाउजु हुन्। उनको सगरमाथा आरोहण गरेर फर्कने क्रममा ज्यान गएको थियो। उनका भाइ टेण्डि शेर्पाको पनि २०५५ सालमा सोलुखुम्बुको माप्यदुधकोशी गाउँपालिका स्थित अँधेरीखोलामा हेलिकोप्टर दुर्घटनामै परेर ज्यान गएको थियो।

    एडमण्ड हिलारी र तेञ्जिङ नोर्गे शेर्पाले सगरमाथाको प्रथमपटक आरोहणपछि खुम्बु क्षेत्रमा बाह्य पर्यटकको चहलपहल शुरु भएको ह । त्यही अवसरमा आङछिरिङको परिवार पनि बाह्य पर्यटकलाई घुमाउँदै पर्यटन व्यवसायमा लागेको बताइन्छ। आफ्नै दिदीको ट्रेकिङ कम्पनीबाट शेर्पाले भरिया काम सुरु गरे।

    परिवारनै पर्यटन क्षेत्रमा संलग्न रही देशको पर्यटन प्रवर्द्धनमा महत्वपूर्ण योगदान दिएका आङछिरिङका जेठा दाजुको पहिले नै निधन भइसकेको छ। अरु तीन दाजुभाइ पनि पर्यटन व्यवसायमा संलग्न छन्।

    उच्च ओहदाका व्यक्तिलाई मात्र नभई सामान्य व्यक्तिका लागिसमेत सहयोगी र विकासप्रेमी थिए शेर्पा । सकारात्मक सोचाइ थियो, पर्यटकलाई सुरक्षा, प्रशिक्षित गाइड, गुणस्तरीय सेवा प्रदान गर्नुपर्छ भन्ने मान्यता उनमा थियो ।

tt
45