काठमाडौं ।

चुरे दोहन बढ्दै तराई मरुभूमि हुने अवस्थामा पुगेको भन्दै सरकारले चुरे क्षेत्र संरक्षणको जिम्मा सेनालाई दिने तयारी गरेको छ।

उपप्रधान तथा रक्षामन्त्री ईश्वर पोखरेलले चुरे क्षेत्रको संरक्षण र रक्षाको जिम्मा सेनालाई दिन लागिएको बताए। ‘कुन मोडलमा सेनालाई चुरे संरक्षणको जिम्मा लगाउने भन्नेबारेमा छलफल भइरहेको छ,’ मन्त्री पोखरेलले भने।

रक्षा मन्त्रालयले एक वर्षको अवधिमा गरेका काम र प्रगतिबारे जानकारी दिन मंगलबार आयोजना गरिएको पत्रकार सम्मेलनमा मन्त्री पोखरेलले यस्तो जानकारी गराएका हुन्। उनले मन्त्रालयले राष्ट्रिय महत्वका ऐतिहासिक गढी, किल्ला, स्मारकलगायत महत्वपूर्ण क्षेत्रको संरक्षणको काम पनि अघि बढाएको बताए।