काठमाडौं
।

सचिव र डाक्टरको किचलोमा परेको स्वास्थ्यमन्त्रालयले नियमति कामसमेत गर्न सकेको छैन । करोडौं नागरिकरको स्वास्थ्यका बारे चिन्ता गर्नुपर्ने मन्त्रालय आफै बिरामीमा थलिएको जस्तो भएको छ ।

आज सातौँ राष्ट्रिय स्वाथ्य सेवा दिवस, सरकारी चिकित्सकको आन्दोलनका कारण सरकारले मनाएन । सामान्य शुभकामनाबाहेक अरु कार्यक्रम केही भएन । सचिवद्वय चन्द्रकुमार घिमिरे र पुष्पा चौधरीको बेमेल त यहाँको पुरानै रोग हो । सरकारी चिकित्सकको आन्दोलनका कारण झन् समस्या परेको छ ।
औपचारिक रुपमा स्वास्थ्य दिवसको नारा पनि तय गरेको छैन । सरकारसँग भएको सहमति कार्यान्वयन गर्न माग गर्दै आन्दोलनरत सरकारी चिकित्सकले देशभरका सरकारी स्वास्थ्य संस्थामा आकस्मिकबाहेकका सेवा बहिस्कार गरेका छन्। सरकारलाई अल्टिमेटम दिएका सरकारी डाक्टरहरुले अनिश्चितकालसम्मका लागि सेवा बहिस्कार गर्ने निर्णय सार्वजनिक गरेका छन् । पुल दरबन्दी सिर्जना गरेर चिकित्सकहरुलाई योग्यता र दक्षताअनुसार प्रदेश र स्थानीय तहमा खटाउनुपर्ने मुख्य मागमा कुरा नमिलेपछि सरकारी चिकित्सकले आन्दोलन गरिरहेका छन् ।