काठमाडौं ।

भूमि व्यवस्था, सहकारी तथा गरिबी निवारण मन्त्रालयका मन्त्री र सचिव बिहान करिब १०ः३० बजेतिर चाबहिलमा रहेको मालपोल कार्यालय पुगे । उनीहरुको नजर कर्मचारीको हाजिरकपीमा परर्यो । कार्यालय अनुुगमनका क्रममा केही कर्मचारी अनुुपस्थित भएको देखियो । र, केहीले हाजिर नगरेरै काम गरिरहेको पनि पाईयो । अनि समयमा कार्यालयमा उपस्थित नहुने कर्मचारीलाई कारबाही गरिने भन्दै टोली फर्कियो । यो कार्यालय सवैभन्दा धेरै अवैध रकम लेनदेन हुने कार्यालयको रुपमा परिचित छ । सोही कारण मन्त्री पद्माकुमारी अर्यालले मालपोल कार्यालय चालबिलको छड्के जाँच गरेकी हुन् । तर, टोलीले हाजिरी नभएको केही कर्मचारी बाहेक अन्य चिज भेटेन ।
सिभिल पोशाकमा गएको मन्त्रीको टोलीले कार्यालय प्रवेश गरेर सेवाग्राहीले सेवा लिने प्रत्येक कक्षमा सेवाग्राहीसरह बसेर त्यहाँको गतिविधिको अनुुगमन गरेको थियो । सचिव गोपीनाथ मैनालीसहित अनुुगमनमा पुगेको मन्त्रीको टोलीले सेवाग्राहीसँग सेवा प्रवाहका बारेमा जानकारी समेत लिएको थियो ।

त्यसक्रममा कार्यालयमा मन्त्री अर्याल अनुुगमनमा आएको खबर पाएपछि लेखापढी व्यवसायीहरुले कार्यालयमा व्यवसाय गर्न असहज भएको, व्यस्थापन राम्रो नभएको, भवन सेवामैत्री नभएको भन्दै अनेक गुनासा राखेका थिए । विशेषगरी भूमि व्यवस्था, सहकारी तथा गरिबी निवारण मन्त्री अर्यालले पछिल्लो समय प्रयोगमा ल्याएको सेवाग्राही आफैले भर्नसक्ने फारामका कारण आफ्नो व्यवसाय समस्यामा परेकोप्रति उनीहरुको गुुनासो लक्षित थियो ।
अनुुगमनका क्रममा कर्मचारीले अनलाइन सिस्टमले काम गर्न सहज भएपनि बेलाबेला सर्भर डाउन हुदा काम गर्न समस्या उत्पन्न भएको बताएका थिए । कर्मचारीहरुले विशेषतः अनलाइन सिस्टममा काम गर्नका निम्ती एकचोटी लिएको तालिम पर्याप्त नभएको र थप तालिमको आवश्यकता रहेको बताएका थिए ।

सेवासँगै जोडिएर अहिले उठेको सुशासनमाथिको प्रश्नको कुरालाई निरुपण गर्न सेवामा प्रविधिको प्रयोग लगाउन खोजेका मन्त्रीको भनाई छ ।
त्यस अवसरमा मालपोल कार्यालय चाबहिलका कार्यालय प्रमुख पदमप्रसाद अर्यालले अहिले भाडामा रहेको कार्यालयको संरचना सेवामैत्री नहुँदा सेवाप्रवाहमा समस्या भएको बताए ।
ठेकेदारले समयमा भवन निर्माण सम्पन्न गर्न नसकेको कार्यालय प्रमुख अर्यालले बताए ।