कान्तिपुर टेलिभिजनमा १७ वर्षदेखि कार्यरत र १२ वर्षदेखि स्थायी भएका कर्मचारीहरुको रुवाबासी छ । टेलिभिजनमा भारतीय व्यवस्थापन छिरेलगत्तै पुराना कर्मचारी धपाउने अभियानअन्तर्गत प्रोडक्सन डिपार्टमेन्ट खारेज गरी ‘कान्तिपुर स्टुडियोज्’ नामक कम्पनी बनाएर कर्मचारीलाई जबरजस्ती राजीनामा गराउने क्रम शुरु भएको छ । डेड महिनाअघि प्रोडक्सन विभाग खारेज भई नयाँ कम्पनी आएको भन्दै प्रमुख कार्यकारी निर्माता भुषण दाहाल र शिशिर पछाईले स्थायी कर्मचारीहरुलाई एचआरमा गएर राजीनामा बुझाउन भनेका थिए । उनीहरुलाई कान्तिपुर टेलिभिजनबाट राजीनामा दिएपछि स्टुडियोको कर्मचारीमा नियुक्तिपत्र दिइने, नयाँ प्रक्रियाबाट जागिर खानुपर्ने र तीन महिने परीक्षणमा रहनुपर्ने भनिएको थियो । तर, उनीहरुले अहिलेसम्म राजीनामा दिएका छैनन् । त्यसरी राजीनामा गर्न भनिएका कर्मचारीमा सुनील श्रेष्ठ, नरेश बज्राचार्य, रञ्जु पोखरेल, ज्ञानमणि चापागाईं, बैकुण्ठ सिलवाल, प्रभा अमात्य, संगीता श्रेष्ठ र शिशिर सुवेदीले लिखित रुपमै राजीनामाको दबाब अन्त्य गर्न भनेका अनुरोध गरेका छन् । उनै कर्मचारीको पक्षमा कर्मचारी संघले पुस ९ गते व्यवस्थापनलाई ज्ञापनपत्र दिएको छ । कर्मचारीहरुले राजीनामा दिन नमानेपछि माघ ११ गतेभित्र हाजिर हुनु भनी ४ गतेको मितिमा चिठी लेखिएको छ । ती कर्मचारीलाई धनगढी, सुर्खेत, जनकपुर र विराटनगर सरुवा गरिएको चिठी थमाइएको हो । यसक्रममा भुषण र शिशिरले कर्मचारीलाई राजीनामा दिइहाल्नका लागि पटक–पटक ‘प्रोडक्सन डिपार्टमेन्ट छैन । तिमीहरु कहाँ जान्छौ ?’ भन्दै धम्की र त्रास दिएको पनि कर्मचारीहरुले बताएका छन् । त्यहाँ स्थापनाकालदेखि काम गरेका १२ जना कर्मचारी बाँकी छन्, जसमध्ये १२ वर्षअघि सबै स्थायी भइसकेको जनआस्थाले छापेको छ ।