काठमाडौ । अष्ट्रेलियाका लागि नेपाली राजदूत लक्की शेर्पाको विषयमा कुनै निर्णय नभएको परराष्ट्रमन्त्री प्रदीप ज्ञवालीले बताएका छन्। केही सञ्चार माध्यमले लक्की शेर्पालाई हटाईएको समाचार दिएका थिए ।

मन्त्री ज्ञवालीले भने, ‘शेर्पाको विषयमा सरकारले कुनै निर्णय लिएको छैन, छानबिनको क्रममै छ।’

शेर्पाका सवारी चालक वाङ्छु शेर्पाले उनी मानव बेचविखनमा संलग्न रहेको आरोप लगाएका थिए। शेर्पामाथि सवारी चालक वाङ्छु शेर्पाले आफूलाई अष्ट्रेलिया लैजान राजदूत शेर्पाले रकम लिएको आरोप लगाएका थिए।

सवारी चालकले राजदूत शेर्पामाथि मानव तस्करी तथा श्रम शोषणको आरोप लगाएपछि परराष्ट्रले उनीमाथि स्पष्टीकरण सोधेको थियो। उनको लिखित स्पष्टीकरण चित्तबुझ्दो नभएको भन्दै मन्त्रालयले समिति नै गठन गरी छानबिनका लागि काठमाडौं बोलाएको हो।

तर, शेर्पाले आफू विरुद्ध लगाइएको आरोप निराधार रहेको बताउँदै आएकी छिन्। चालकलाई कामबाट निकाला गरेपछि विवादमा पार्ने प्रयास गरिएको उनले दाबी गर्दै आएकी छिन्।