• सिन्धुपाल्चोक ।

    भोटेकोशी पावर कम्पनीले दिने सहयोगमा बिभेद भएपछि भोटेकोशी गाउँपालिमा रहेको तातोपानी आधारभूत बिद्यालयले आक्रोश पोखेको छ । भोटेकोशी पावर कम्पनीबाट सवैभन्दा धेरै प्रभावित रहेको यो बिद्यालयलाई बिगतदेखि उपलब्ध गराउँदै आएको सुबिधा नै कटौती गरेपछि बिद्यालयका अध्यक्ष र प्रधानाध्यापकले संयुक्तरुपमा पत्र लेखेर नै सहयोगमा बिभेद भएको भन्दै आक्रोश पोखेका हुन् । पावर हाउसले प्रयोग गर्ने भोटेकोशी नदीको किनारैमा रहेको यो बिद्यालयलाई पावर कम्पनीले बिगतदेखिनै बिभेद गर्दै आएका कारण कार्यालयमा नै गएर असन्तुष्टी ब्यक्त गरेको प्रधानाध्यापक कृष्ण नेपालले वताए । पटक पटक आएको भोटेकोशीको बाढी बाट पनि धेरै क्षती भएको यो बिद्यालयमा भोटेकोशीले सम्झौता अनुरुपको सहयोग नगरेको बिद्यालयको भनाई छ । जुन तहसम्म सञ्चालन भएको बिद्यालय छ सोही तहको एकजना शिक्षकको तलव भोटेकोशी पावर कम्पनीले दिने बिगतको सम्झौता भएपनि कम्पनीले हाल मासिक रुपमा १५ हजार रुपैयाँमात्र उपलब्ध गराएको नेपालले वताए । नदी किनार छेवैमा भएको यो बिद्यालयलाई पावर कम्पनीले हेपेको अनुभूति भएपछि बिभिन्न निकायमा ध्यानाकर्षण पनि गराईएको बिद्यालय ब्यवस्थापन समितिका अध्यक्ष बिष्णुवहादुर श्रेष्ठले बताए । कम्पनीलाई पटक पटक अनुरोध गर्दा पनि नसुनेपछि प्रकृयागत रुपमा अघि बढिएको र अव जिल्ला,प्रदेशसम्मका प्रशासनिक निकायमा न्यायको लागि जाने अध्यक्ष श्रेष्ठको योजना छ । अन्य बिद्यालयको भौतिक संरचनासमेत कम्पनीले निर्माण गरेपनि यस बिद्यालयलाई भने कम्पनीले पुरै वेवास्ता गरेको स्थानीयले गुनासो गरिरहेका छन् ।