-
काठमाडौं ।
प्रतिनिधिसभाका विषयगत समितिको सभापतिमा निर्विरोध भएका छन् । सभापतिमा एकल उम्मेदवारी परे सँगै उनीहरु सभापति निश्चित भएका हुन् ।
प्रतिनिधिसभाका १० विषयगत समितिमध्ये ८ वटा समितिमा नेपाल कम्युनिस्ट पार्टी (नेकपा) का सदस्यको उम्मेदवारी परेको छ भने नेपाली कांग्रेस र संघीय समाजवादी फोरमले एक–वटा समितिको सभापति पाउने भएका छन्।
संघीय समाजवादीले उद्योग, वाणिज्य तथा श्रम समितिको सभापति पाउने भएको छ। सो समितिको सभापतिमा विमल श्रीवास्तवको मात्रै उम्मेदवारी परेको छ। त्यस्तै लेखा समितिको सभापतिमा नेपाली कांग्रेसका भरतकुमार साह निर्विरोध भएका छन्।
अर्थ समितिमा सांसद कृष्णप्रसाद दाहाल, अन्तर्राष्ट्रिय सम्बन्ध समितिमा पवित्रा निरौला खरेल, कानुन न्याय तथा मानव अधिकार समितिमा कृष्णभक्त पोखरेल, कृषि, सहकारी तथा प्राकृतिक स्रोत समितिमा पूर्णकुमारी सुवेदी, महिला तथा सामाजिक समितिमा निरुदेवि पाल, राज्य व्यवस्था तथा सुशासन समितिमा शशि श्रेष्ठ, विकास तथा प्रविधि समितिमा कल्याणीकुमारी खड्का, शिक्षा तथा स्वास्थ्य समितिमा जयपुरी घर्तीको एकल उम्मेदवारी परेको छ। यी सबै सांसद नेकपाका हुन्।
शुक्रबार निर्वाचन प्रक्रियामार्फत दश वटै समितिका सभापतिको औपचारिक घोषणा हुनेछ।
