काठमाडौं ।

आफू कानुनमन्त्री हुँदाका बखत सार्वजनिक पदमा रहेका ब्यक्तिले अनिवार्य आफ्नो सम्पत्ति बिवरण सार्वजनिक गर्नुपर्ने ब्यवस्थासहित कानुनको मस्यौदा तयार गरेपनि पछि मन्त्री परिषदको बैठकले सो बुँदा नै हटाएपछि पूर्व कानुनमन्त्री शेरवहादुर शेरबहादुर तामाङले यस वारे चर्को आवाज उठाएका थिए । अन्तत्वोगत्वा उनको यो पहल सार्थक भएको छ ।

मौलिक हक कार्यान्वयनका लागि संसदको राज्य व्यवस्था समितिमा छलफलमा रहेको ‘व्यक्तिको वैयक्तिक स्वतन्त्रता विधेयक’मा समितिले उक्त व्यवस्था राख्ने सहमति गरेपछि अब अनिवार्य रुपमा सम्पत्ति विवरण सार्वजनिक गर्नुपर्ने भएको छ ।
सोमबार सिंहदरबारमा भएको समितिको छलफलमा विधेयकमा यस्तो व्यवस्था राख्न सहमति भएको तामाङले बताए । यसअघि गोप्य राख्ने प्रस्ताव गरिएको थियो। तामाङ कानुनमन्त्री हुँदा मस्यौदा गरेको विधेयकमा उक्त दफामा सार्वजनिक गर्ने भनिएको थियो। तर, मन्त्रिपरिषद्बाट पारित भई प्रतिनिधिसभामा दर्ता हुँदा सार्वजनिक गर्नुपर्ने व्यवस्था हटाइएको थियो।

तामाङका अनुसार यसअघि गोप्य रहने भनि राखिएको वैयक्तिक गोपनियता सम्बन्धी कानुनमा ‘सार्वजनिक पदधारण गरेका पदाधिकारीहरुको सम्पत्ति विवरण प्रचलित कानुन बमोजिम सार्वजनिक गर्न यस कानुनले कुनै बाधा नपर्ने’ भन्ने वाक्य राख्ने सहमति भएको छ।