• काठमाडौं । आइतबार २४ घण्टाको अवधिमा थप २ हजार ७१ जनामा कोरोना संक्रमण देखिएको छ । स्वास्थ्य तथा जनसंख्या मन्त्रालयको नियमित कोभिड–१९ प्रेस ब्रिफिङका क्रममा प्रवक्ता डा. जागेश्वर गौतमले नयाँ थपिएका उक्त संख्याको पुष्टि गरेका हुन् । उनका अनुसार यस अवधिमा १२ हजार ४२७ जनाको नमूनाको पीसीआर परीक्षण भएको छ । यीसँगै नेपालमा कोरोनाबाट संक्रमित हुनेको कुल संख्या एक लाख सात हजार ७५५ पुगेको छ । नेपालमा शनिबार एकैदिन ५ हजार ८ जनामा कोरोना संक्रमण पुष्टि भएको थियो ।

    त्यसैगरी कुल संक्रमितमध्ये नेपालमा हालसम्म कोरोनाबाट ज्यान गुमाउनेको संख्या ६ सय ३६ पुगेको मन्त्रालयको तथ्यांकमा उल्लेख छ । २४ घण्टाको अवधिमा २२ जनाको कोरोना संक्रमणबाट मृत्यु भएको मन्त्रालयले पुष्टि गरेको छ । मृतकमध्ये ५ महिला र १७ जना पुरुष भएको मन्त्रालयले जनाएको छ ।

    मन्त्रालयका अनुसार आइतबार थप १५ सय ५२ जना डिस्चार्ज भएका छन् । यसरी अहिलेसम्म कोरोनामुक्त हुनेको संख्या ७५ हजार ८ सय ४ पुगेको छ । यो निको हुने दुर कुल संक्रमितको ७० दशमलव ३ प्रतिशत हो । बाँकी सक्रिय संक्रमितको संख्या ३१ हजार ३१५ पुगेको छ । तीमध्ये संस्थागत आइसोलेशनमा १३ हजार ६४९ र होम आइसोलेशनमा १७ हजार ६६६ जना रहेको मन्त्रालयले जानकारी दिएको छ । अहिले देशभरका क्वारेन्टाइनमा ४ हजार ६१६ जना रहेका छन् ।