• काठमाडौं । मंगलबार नेपालमा थप १ हजार ५५१ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । मन्त्रालयका प्रवक्ता डा. जागेश्वर गौतमका अनुसार पछिल्लो २४ घण्टामा ११ हजार ४७ पीसीआर परीक्षण भएकोमा उक्त संख्यामा संक्रमित थपिएका हुन् । यसरी नेपालमा अहिलेसम्म संक्रमितको संख्या ९० हजार ८१४ पुगेको छ ।

    आज थपिने नयाँ संक्रमितमा काठमाडौं उपत्यकाका मात्र १ हजार १७ जना रहेका प्रवक्ता डा. गौतमले बताए । जसमा काठमाडौंका ७८३, ललितपुर ११८ र भक्तपुरका ११६ जना छन् ।

    यसै अवधिमा थप २३ सय ४० जनाले कोरोनामुक्त भएका छन् । योसँगै अहिलेसम्म कुल डिस्चार्ज हुनेको संख्या ६७ हजार ५४२ पुगेको मन्त्रालयले बताएको छ । त्यसैगरी बाँकी सक्रिय संक्रमितको संख्या २२ हजार ७०९ पुगेको छ । जसमध्ये संस्थागत आइसोलेसनमा ९ हजार ११८ र होम आइसोलेसनमा १३ हजार ५९१ जना रहेको मन्त्रालयले जानकारी दिएको छ ।

    मन्त्रालयका अनुसार २४ घण्टामा उपत्यकामा ५ सहित मुलुकभरबाट ९ को मृत्यु भएको छ । यसरी अहिलेसम्म कोरोनाकै कारण ज्यान गुमाउनेको संख्या ५६३ जना पुगेको छ ।

    त्यस्तै क्वारेन्टाइनमा रहनेको संख्या ४ हजार २२१ जना पुगेको छ ।