• काठमाडौं । सोमबार नेपालमा थप २ हजार ४४० जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित कोभिड–१९ अपडेटमा प्रवक्ता डा. जागेश्वर गौतमले पछिल्लो २४ घण्टामा मुलुकभरबाट २ हजार ४४० जनामा संक्रमण देखिएको बताएका हुन् । उनका अनुसार यस अवधिमा १३ हजार ७८१ वटा नमूनाको पीसीआर परीक्षण भएको थियो । यीसँगै नेपालमा कोरोना संक्रमितको कुल संख्या ८९ हजार २ सय ६३ जना पुगेको छ ।

    त्यसैगरी यसै अवधिमा १ हजार १ सय ३३ कोरोनामुक्त भएर डिस्चार्ज भएको प्रवक्ता डा. गौतमले बताए । यसरी अहिलेसम्म कुल संक्रमित मध्ये ६५ हजार २०२ जना निको भएका छन् । बाँकी सक्रिय संक्रमितको संख्या २३ हजार ५०७ रहेको छ । तीमध्ये संस्थागत आइसोलेसनमा ११ हजार १९१ र होम आइसोलेसनमा १२ हजार ३१६ जना रहेको सो अवसरमा उनले जानकारी दिए ।

    सक्रिय संक्रमितमध्ये २४४ आइसीयूमा र ४३ जनाको भेन्टिलेटरमा उपचार भइरहेको मन्त्रालयले बताएको छ । अहिले मुलुकभरका क्वारेन्टाइनमा रहनेको संख्या ४ हजार ३३ जना रहेको छ । मन्त्रालयका अनुसार पछिल्लो २४ घण्टामा थप १९ जनाको संक्रमणबाट मृत्यु भएको छ । यसरी नेपालमा हालसम्म कोरोनाकै कारण ज्यान गुमाउनेको संख्या ५ सय ५४ पुगेको सरकारी तथ्यांकमा उल्लेख गरिएको छ ।