काठमाडौं । माओवादी केन्द्र छाडेर एमाले प्रवेश गरेका चार मन्त्रीले आज फेरि मन्त्री पदको शपथ लिएका छन् । यसरी सपथ लिने मन्त्रीमा ऊर्जा, जलस्रोत तथा सिँचाइमन्त्री टोपबहादर रायमाझी, उद्योग, वाणिज्य तथा आपूर्तिमन्त्री लेखराज भट्ट, शहरी विकासमन्त्री प्रभु शाह र श्रम, रोजगार तथा सामाजिक सुरक्षामन्त्री गौरीशङ्कर चौधरी रहेका छन् । उनीहरुले यस अघिकै मन्त्रालयमा निरन्तरता पाएका छन् । प्रधानमन्त्री ओलीले चारैजना नेतालाई मन्त्री पदमा पुनर्नियुक्तिका सिफारिस गरेपछि राष्ट्रपति विद्यादेवी भण्डारीले राष्ट्रपति भवन शीतलनिवासमा आयोजित समारोहमा शुक्रबार साँझ फेरी शपथ गराएकी हुन् ।

उक्त समारोहमा प्रधानमन्त्री केपी शर्मा ओलीलगायत उच्चपदस्थ पदाधिकारीको उपस्थिति थियो । उनीहरु चार जना नेकपा (माओवादी) केन्द्र त्याग गरी नेकपा (एमाले) मा प्रवेश गरेको भन्दै माओवादी केन्द्रले कारबाही गरेको थियो । केन्द्रको सूचनाका आधारमा बिहीबार प्रतिनिधिसभाबाट उनीहरुको सांसद पद रिक्त भएको घोषणा गरिएको थियो । सांसद नरहेपछि मन्त्रीमा कायम रहन नमिल्ने भएकाले उनीहरुलाई पुनः नियुक्त गरिएको हो । सांसद नभए पनि छ महिनासम्म मन्त्रीमा नियुक्त गर्न सकिने संवैधानिक व्यवस्था छ ।