काठमाडौँ। आर्थिक वर्ष २०७७/०७८ को वार्षिक नीति तथा कार्यक्रम संसदका दुवै सदनबाट बहुमतले पारित भएको छ ।

यही जेठ २ गते राष्ट्रपति विद्यादेवी भण्डारीले दुवै सदनकोे संयुक्त बैठकलाई सम्बोधन गर्दै नीति तथा कार्यक्रम प्रस्तुत गरेकी थिइन् । त्यसपछि नीति तथा कार्यक्रममाथी संसदका दुवै सदनमा छलफल भएको थियो । छलफलका क्रममा उठेका प्रश्नको आज प्रधानमन्त्री केपी शर्मा ओलीले जवाफ दिएसँगै सो नीति तथा कार्यक्रम पारित भएको हो ।

प्रतिनिधि सभाको बैठकमा सभामुख अग्निप्रसाद सापकोटाले निर्णयार्थ प्रस्तुत गर्दा बहुमतले प्रस्ताव पारित भएको हो । प्रमुख विपक्षी दल नेपाली कांग्रेस, समाजवादी पार्टी, राष्ट्रिय जनता पार्टीलगायतले नीति तथा कार्यक्रमको विपक्षमा मतदान गरेका थिए ।

नीति तथा कार्यक्रम पारितअघि दर्ता भएका पाँचवटा संशोधन प्रस्ताव बहुमतबाट अस्वीकृत भएका थिए । प्रमुख विपक्षी दल नेपाली कांग्रेसका सांसद मीनेन्द्र रिजालले प्रस्ताव फिर्ता नलिएपछि बुहमतबाट अस्वीकृत भएको छ । कांग्रेसका तर्फबाट रिजालले संशोधन दर्ता गराएका थिए । त्यस्तै अन्य पार्टीका सांसदले राखेको संशोधन प्रस्ताव पनि बुहमतबाट अस्वीकृत भएको छ ।

त्यसैगरी नीति तथा कार्यक्रमलाई आजै राष्ट्रियसभाले पनि पारित गरेको छ । बैठकमा अध्यक्ष गणेशप्रसाद तिमल्सिनाले निर्णयार्थ प्रस्तुत गर्दा बहुमतले प्रस्ताव पारित भएको हो । कार्यक्रममाथि सदस्य अनिता देवकोटा, शेखरकुमार सिंह र प्रमिलाकुमारीले गरेको संशोधन प्रस्ताव बहुमतले अस्वीकृत भएको हो ।