काठमाडौं । नेपालमा पहिलो पटक तीन भारतीय नागरिकमा कोरोनाभाइरस सङ्क्रमण देखिएको छ । यसभन्दा अघि ९ जना नेपालीमा सङ्क्रमण पुष्टि भइसकेको छ । यो सँगै नेपालमा अब सङक्रमितको संख्या १२ पुगेको छ । हेटौँडाको प्रयोगशालामा गरिएको परीक्षणको नतिजालाई पुष्टि गर्न काठमाडौँस्थित टेकुको प्रयोगशालामा पुनः परीक्षण गरिएको थियो ।

पर्साको बिरगंज महानगरपालिका, वडा नं. २, छपकैया स्थित मस्जिदमा शंकास्पदरूपमा बस्दै आएका मध्ये केहीलाई स्वाथ्यमा समस्या आएको जनाइएको थियो । कोरोनाको आशंकामा थ्रोट स्वाव संकलन गरी परीक्षण गरिएका मध्ये ३ जनामा कोभिड–१९ सङ्क्रमण पुष्टि भएको स्वास्थ्य मन्त्रालयले जानकारी गराएको छ ।

उनीहरु ३७, ५५ र ४४ वर्षका भारतीय नागरिकहरु रहेका छन् । उनीहरूको शुक्रवारदेखि नै नारायणी अस्पताल, बिरगंजमा आईसोलेशनमा राखि उपचार भइरहेको बताइएको छ ।

सङ्क्रमित तीनै जना मुस्लिम धर्मका प्रचारक धार्मिक गुरु भएको र नेपालमा धर्म प्रचारको लागि आएको बताइएको छ । उनीहरु केहीदिन अघि दिल्लीमा भएको तब्लगी जमातमा सहभागी भई फर्किएको आशंका पनि गरिएको छ । स्थानीयका अनुसार उनीहरु ९/१० दिन पहिलादेखि उक्त मस्जिदमा बस्दै आएका थिए । ।

सङ्क्रमण पुष्टि भएसँग अहिले सङ्क्रमितहरूलाई नारायणी अस्पताल वीरगञ्जमा छुट्टाछुट्टै राखेर उपचार सुरु गरिएको छ । सङ्क्रमित तीनै जनाको स्वास्थ्य अवस्था समान्य रहेको जनाइएको छ । यता स्वास्थ्य मन्त्रालयले उनीहरूको संसर्गमा आएका तथा उनीहरू गएको स्थान पहिचान गरि परीक्षण गर्ने कार्यहरू भइरहेको जानकारी दिएको छ ।