काठमाडौं । राष्ट्रिय जनस्वास्थ्य प्रयोगशालामा आज गरिएको परीक्षणमा अर्का एक जनामा पोजेटिभ देखिएसँगै अब नेपालमा कोरोना भाइरस (कोभिड–१९) संक्रमितको संख्या ६ पुगेको छ । स्वास्थ्य मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले चैत ४ गते कतारको दोहाबाट कतार एयरवेजको विमान क्यूआर ६५२ बाट आएमा व्यक्तिमा संक्रमण भेटिएको बताएका छन् । छैटौं संक्रमित पनि बागलुङकै भएको बताइएको छ ।

यसअघि सोही जहाजमा आएका अन्य दुई जनामा पनि कोरोना संक्रमण देखिएको थियो । तीमध्ये एकजनाको टेकु अस्पताल र अर्की एक युवतीको धौलागिरी अञ्चल अस्पतालमा उपचार भइरहेको छ ।

नेपालमा अहिलेसम्म ११ सय ८४ जनाको कोरोना परीक्षण भएको छ । मन्त्रालयका अनुसार काठमाडौं उपत्यकामा १६ सहित देशभरमा अहिले १ सय पाँच जना आइसोलेसनमा रहेका छन् भने बिहीबार मात्र ३९ जनाको कोरोना परीक्षण भएको बताइएको छ ।

डाक्टर देवकोटाका अनुसार अहिले काठमाडौंमा ४३ र धरानमा १२ वटा नमुना परीक्षणको क्रममा रहेको तथा सैनिक अस्पतालमा १७ वटा स्वाब नमुना परीक्षणका लागि लिएको पनि उनले जानकारी दिएका छन् ।