काठमाडौँ । विश्वभरि नै त्रास फैलाएको कोभिड –१९ भाइरसको बढ्दो सङ्क्रम बढ्न नदिन गरिएको लकडाउनका कारण आफ्नो गन्तव्यसम्म पुग्न नपाई बीच बाटोमा अलपत्र परेका व्यक्तिलाई प्रशासनको सहयोगमा गन्तव्यसम्म पुग्न र खान बस्नको व्यवस्थापन गर्न आफ्ना जिल्ला समितिलाई नेपाल तरुण दलले ‘परिपत्र गरेको छ । तरुण दलले एक परिपत्रमार्फत लकडाउनका कारण सीमानाकामा अलपत्र नेपालीलाई तोकिएको समय क्वारेन्टाइनमा बस्ने गरी नेपाल भित्रिने सहज वातावरण मिलाउन आफ्ना सम्बन्धित जिल्ला अध्यक्षलाई स्थानीय प्रशासनसँग समन्वय गर्न निर्देशन गरेको हो ।

तरुण दलका अध्यक्ष जीतजङ्ग बस्नेतले परिपत्रमार्फत कोरोना भाइरसको सङ्क्रमणबाट जोगिन सरकारले लागू गरेको लकडाउनको अवधिमा दैनिक जनजीवन कठिन हुने र यस्तो अवस्थामा स्थानीय प्रशासनसँग अनुमति लिई नियम क्रियाकलापमा सहजीकरण गर्न सबै जिल्ला अध्यक्षलाई आग्रह गरेका छन् । सबै जिल्ला कार्यसमितिलाई बाहिरी मुलुकबाट आएका व्यक्ति क्वारेन्टाइनसम्म पुग्न नसकेका र नपुगेका भए स्थानीय प्रशासनसँग सहयोग लिई गन्तव्यसम्म पुग्ने वातावरणको सिर्जना गरी सहयोग गर्न अध्यक्ष बस्नेतले निर्देशन दिएका छन् ।

सरकारले लागू गरेको लकडाउनको पूर्णपालना गर्न र गराउन आवश्यक भूमिका निर्वाह गर्न, देशका विभिन्न भू–भागबाट सबै जिल्लामा बसोबास गर्ने व्यक्तिलाई कुनै समस्या परेको भए त्यसको समस्या समाधान गर्न सहयोग गर्न र दैनिक ज्याला मजदुरी गरी छाक टार्ने वर्गलाई निर्वाहका लागि आवश्यक सहयोग गर्न तरुण दलले आफ्ना जिल्ला समितिलाई परिपत्र गरेको हो । खाद्यान्न, तरकारी, दूध, औषधि, पानीलगायत दैनिक उपभोग्य सामानको खरिद गर्दा भीडभाड हुने भएकाले केही सजगता र एकअर्काबीच दूरी कायम गर्न तथा स्थानीय प्रशासनको समन्वयमा खरिद प्रक्रियामा सहजीकरण गर्नसमेत तरुण दलले भनेको छ । तरुण दलले अति आवश्यक कामबाहेक अन्य काममा घर बाहिर ननिस्की सुरक्षित तरिकाले घरमै बसी केही समयलाई समाजिक दूरी कायम गर्न सबैलाई आग्रह गरेको छ ।