भद्रपुर । मेचीनगर नगरपालिकाले नगरवासीलाई घरभित्रै बसेर सुरक्षित रहन आह्वान गर्दै खाद्यान्न, उपचार र अन्य कुनै केही समस्या भएमा नगरपालिकामा सोझै सम्पर्क गर्न आग्रह गरेको छ । नगर प्रमुख विमल आचार्यले आज प्रेस विज्ञप्ति जारी गरी समस्या परेका नगरवासीलाई सम्पर्क गर्नुपर्ने व्यक्ति र फोन नम्बरहरु सार्वजनिक गरेका छन् । खाद्यान्न र अत्यावश्यक स्वास्थ्य सेवा आवश्यक भए तत्काल नगरपालिकाको स्वास्थ्य शाखाको फोन नं. ९८४२६३८३२९ र विपत् व्यवस्थापन समितिका संयोजकको नं ९८०११०६०८५ मा सम्पर्क गर्न विज्ञप्तिमार्फत नगरपालिकाले आग्रह गरेको छ ।

कोरोना भाइरसको संक्रमण नियन्त्रण गर्न र पूर्वीनाकामा कडाइ गर्न नगरपालिकाले सक्रियतापूर्वक विभिन्न कार्य गरिरहेको विज्ञप्तिमा उल्लेख छ । मेचीनगर ७ स्थित सतिघट्टामा माइती नेपालको भवन, वडा नं ११ को धाइजनस्थित स्वास्थ्यचौकी, वडा नं ३ को वडाखालस्थित पशुपति माध्यमिक विद्यालय र वडा नं ४ सरस्वती माध्यमिक विद्यालय क्वारेन्टाइन बनाइएको नगरप्रमुख आचार्यले जानकारी दिएका छन् । क्वारेन्टाइनमा भारतलगायत विभिन्न मुलुकबाट फर्किएकालाई उचित प्रबन्धसहित राखिएको बताइएको छ । मेचीनगरका १५ वटै वडामा निसंक्रमणका लागि स्प्रे तयारी गरिएको र केही वडामा स्प्रे प्रारम्भ भइसकेको विज्ञप्तिमा उल्लेख छ ।

सुरक्षाकर्मी तथा स्वास्थ्यकर्मीका लागि ५०० थान मास्क, ६० थान पिपिई र २० लि स्यानिटाइजर वितरण गरिएको, सवै वडामा रहेका स्वास्थ्य केन्द्र र एकाइका जनशक्तिलाई परिचालन गरिएको, नगर क्षेत्रका दुई एम्बुलेन्ससहित स्वास्थ्यकर्मीको टोली आपत्कालीन अवस्थाका लागि परिचालन गरिएको र अन्तरराष्ट्रिय सीमा काँकरभिट्टाबाट नेपाल प्रवेश गरेका ८५ हजारभन्दा बढी यात्रुको इन्फ्रारेड थर्मामिटरबाट हेल्थ डेस्कमा ज्वरो स्क्रिनिङ गरिएको नगरप्रमुख आचार्यले जानकारी दिएका छन् ।

लकडाउनपछि नेपालका विभिन्न स्थानमा जाने यात्रुलाई गन्तव्य स्थानसम्म पुर्‍याउन सहजीकरण गरिएको र टोल विकास संस्थालाई परिचालन गरिएको विज्ञप्तिमा जनाइएको छ ।
क्वारेन्टाइनमा बस्दा स्वास्थ्य समस्या देखिएमा तत्काल वडा अध्यक्ष वा उल्लिखत सम्पर्क नम्बरमा सम्पर्क गर्न, अत्यावश्यक सामग्रीको कालो बजारी र मूल्य वृद्धि नगर्न, खाद्यान्नलगायत अत्यावश्यक सामग्री बिक्री वा खरीद गर्दा न्यूनतम १ मिटरको दूरीमा चुना वा अन्य सामग्री प्रयोग गरेर सेतो घेरा बनाई खरीदबिक्री गर्न, अति विपन्न एवम् असहायका लागि खाद्य सामग्री अभाव भए टोल विकास संस्थाका अध्यक्षमार्फत वडा समितिका अध्यक्ष/सदस्यमार्फत नगरपालिकामा सम्पर्क गर्न हुन, सरकारद्वारा जारी लकडाउनका अवधिमा ट्रयाक्टर, टेम्पु, मोटरसाइकललगायत अन्य सवारी साधन प्रयोग नगर्न नगराउन विज्ञप्तिमा अनुरोध गरिएको छ । लकडाउनको अवज्ञा गरी कुनै क्रियाकलाप गरेमा प्रचलित कानूनबमोजिम कडा कानूनी कारवाही हुनेसमेत नगरपालिकाले जनाएको छ ।

नगरवासीलाई कहीँ कतै कुनै समस्या भए प्रमुख प्रशासकीय अधिकृत महेन्द्रकुमार खाम्याहाङ ९८५२०५६६०१, वरिष्ठ प्रशासकीय अधिकृत अनन्तप्रकाश वस्ती ९८५२६७२७५८ र खाद्य विश्लेषक दीपेन्द्र कार्की ९८५२६७७६७ सँग सोझै सम्पर्क गर्ने सकिनेसमेत विज्ञप्तिमा उल्लेख छ । रासस