काठमाडौँ । सर्वोच्च अदालतको पूर्ण बैठकले विश्वभर फैलिरहेको कोभिड–१९ भाइरसको सम्भावित संक्रमणबाट बच्न देशभरका अदालतहरुमा अति आवश्यक बाहेकका अन्य सेवा बन्द गर्ने निर्णय गरेको छ । सर्वोच्च अदालतमा शुक्रबार प्रधानन्यायाधीश चोलेन्द्र शम्शेर जबराको अध्यक्षतामा बसेको पूर्ण बैठकले अदालतहरु यही चैत २१ गतेसम्मका लागि बन्द गर्ने निर्णय गरेको हो ।

केही दिनअघि नेपाल बार एशोसिएसनले विश्वभरि नै कोभिड–१९ भाइरस फैलिरहेको अवस्थामा अत्यावश्यक कामबाहेक अन्य सेवा प्रवाह नगर्ने निर्णय गर्न अदालतसमक्ष आग्रह गरेको थियो । त्यसपछि प्रधानन्यायाधीश जबराले आकस्मिक पूर्ण बैठक डाकेका थिए । अदालतको पूर्ण बैठकको निर्णय अनुसार अदालत प्रशासन पनि बन्द रहनेछ । बन्दी प्रत्यक्षीकरणको निवेदनमा भने सर्वोच्च, उच्च र जिल्ला अदालतमाहरुमा सुनुवाई हुने जानकारी गराएको छ ।